專題人物：寸嘴星級裁縫　誓死反共

一個世紀前，中環有位裁縫，靠着一雙巧手，一針一線為達官貴人縫製華衣美服；一個世紀後，他的孫子杜達仍守護着「天倫洋服」招牌，為國際名牌、城中名人改衫執漏。
還以為杜老闆捍衞中環店子生意，反對佔中，怎料他誓死反共，名片地址一欄印着「解放南路（即前英帝殖民地荷李活道）87號1樓」。「冇番條解放南路，似唔似解放香港先？共產黨話（50年）唔變你信唔信先？我信共產黨一定會變，咪同佢改咗（名）先！」
記者：潘婉玲
攝影：中環特工隊

受身高所限，替宇宙最強甄子丹（右）改衫最費勁。

泰國前總理他信（左）叫杜達到連卡佛改衫。

《聖誕玫瑰》首映禮，杜達替導演楊采妮（左）改衣。

杜達自稱革命黨員，六四時期結識時任支聯會主席司徒華，「帶埋個女去遊行，嗰日好似10號風球」。支聯會後來的活動，他必列席。轉眼24個年頭，中共不承認歷史事實，他卻雋刻於心，「未試過唔去（六四集會），有命一日都會去」。

杜達的卡片流露反共思想，「人民力量」茶餐廳更由華叔題字。

外國遊客也懂門路摸上門。

天倫如今鮮有造西裝，以改衫為主。

開茶記叫「人民力量」

兩年前涉足飲食業，於新蒲崗開設茶餐廳「人民力量」，名字由司徒華所起，招牌上的四個大字，也是華叔親筆所題，「我早10年前叫佢寫咗，點知未剪綵，佢都死鬼咗，俾死人黃毓民用咗呢個名」。華叔臨終反對五區公投，被指晚節不保，甚至有痛腳在共產黨手中，杜達認為說法不成立，「佢都拼死無大害，佢仲怕咩？我相信一定有佢嘅苦衷！」
杜老闆毫不掩飾反共立場，但近年大陸客湧港，散客中七成是內地人，是否有點自打嘴巴？「我唔介意少啲生意！」他的確寸得起，皆因早已貴為Armani、Salvatore Ferragamo、Lanvin等國際品牌的御用裁縫，客人買衫後要修改，名店便交予天倫代勞，若遇大減價，生意更是應接不暇。
天倫跟連卡佛合作關係長達20年，去年不歡而散，「如果我哋整爛一定賠，但佢係咪都入我哋數，咪唔鬼做囉！一條褲收55蚊，郁吓賠4,000、5,000蚊，賠一半都死啦，點賠呀大佬！」杜達憶起仍一肚火。決裂導火線乃年多前，一位速遞員遺留總值四萬多元衣物於的士上，其後杜達賠兩萬多元。既然錯不在己，何罪之有？「佢（速遞員）窮到搵錢刮沙都冇，我賠住先囉！」
時至今日，連鎖店一套西裝才賣2,000元，天倫訂造一套盛惠5,000元，捨得花錢者，又只愛名牌，裁縫業步向夕陽，如今的天倫以改衫為主，鮮有造西裝。「一味要好睇，其實唔夠我哋做得好，啲人唔理，覺得鈕門邊幼就靚，但其實扣兩扣就爛」。也有不少人到名牌特賣場掃貨後，送到天倫大執，「嗰啲設計師都唔知係咪食屎屙飯，28吋袖，猩猩都冇咁長啦！」杜達曾替客人把西褲腰圍放大六吋、放長七吋，堪稱魔術師。

貴為多個國際品牌御用裁縫，客人包括Salvatore Ferragamo。

杜達入行60年，仍然每天到工場，年中無休。

裁縫業步向夕陽，鮮有年輕人入行。

甄子丹衫最難改

電影首映禮、時裝騷更要杜老闆親自出馬。訪問其間，某品牌來電，相約他到店中為梁朝偉改衫。所謂星級裁縫，原來外勤每小時只收350元，「同做咕喱差唔多㗎咋！」杜達大讚劉嘉玲、陳慧琳及任達華身型完美，幾乎不用修改，「宇宙最強」則最費勁，「甄子丹我以為佢好高，其實都唔係」。已故慈善家鄧肇堅次子鄧日燊，每周派司機接他到其跑馬地寓所，「佢啲衫多到用垃圾袋裝，以前佢用洗衣機洗到縮水，仲話：『縮得好』，嗰件好似係CHANEL。𠵱家唔會喇，知可以改短，佢話好彩識到我」。
杜家三代皆於中環當裁縫，72歲的杜達入行整整一個甲子，從來只為他人作嫁衣裳，「我買幾百蚊一套㗎咋，賠（錢）嗰啲都着唔切啦，哈哈！」就連兒子結婚，新郎禮服也是以次貨修改。杜達偶爾職業病發，留意電視螢幕中的高官衣着，乘機反共，「香港嗰啲都係一般；江澤民咁嘅屎桶都着到西裝，我真係想知邊個同佢做！」
當裁縫工時長，又沉悶，鮮有後生入行，他迄今只收過一個徒弟，「我想開班教人哋改衫，但原來要攞牌咁麻煩」。此刻又不忘搵位入土共：「我想去職工盟天水圍教；工聯會？我唔去㗎！」

中環特工隊爆料熱線
WhatsApp：91314511