末日博士離開交銀 轟政權滅聲 羅家聰：連走資都唔俾講

https://hk.finance.appledaily.com/finance/20191115/IPSO6WJG7VWHBZ64UQDYCI34MY/

末日博士離開交銀　轟政權滅聲
羅家聰：連走資都唔俾講

「香港末日博士」羅家聰指社會環境轉變，令金融中心的核心價值受蠶食。何耀勤攝

【人物專訪】「香港末日博士」羅家聰上月突離任職逾14年的中資交通銀行（香港），箇中原因他不願多談。惟身為中環人，不禁慨嘆社會環境轉變，令金融中心核心價值受蠶食；他認為近來很多敏感經濟數據已不能講，「以前唔係講啲好黃嘅嘢、唔係講港獨，都係任講……如今淨係有冇走資呢個話題，好多人都唔講得、唔敢講！」
記者：李芷珊

香港烽煙四起，大型銀行或投行對員工的政治取態各有政策。羅家聰指不會將自己標籤成某種顏色，但直言：「做得金融呢行都明白一個道理：我一定有立場、一定有我嘅顏色，但唔可以將佢擺落工作。」雖然無將立場帶入工作，卻要面對政權對行內過份干預、言論自由越趨收緊情況。羅透露早前跟一班行家飯聚閒談均身同感受，「如果由示威作起點得出一個結論，同政府結論唔同，佢（上頭）都唔鍾意」，可謂「一言堂」。

「政府想操控市場」

撇除政治事件，連帶跟整個市場有直接關係的資金走勢，都成禁忌。而人民幣貶值，以及中國經濟表現不景，更不能宣之於口。羅家聰還驚覺除了前公司，一眾中資銀行最近都被禁止接受記者的即時訪問，外資行也不能預測中國會否加減息，「言論自由」越收越緊，「咁我都明白點解我要走了……我exposure（曝光）咁多」。

羅指，這些不合理控制言論情況於佔中時亦曾發生，但大家避而不談並不代表事件無發生，「好似佔中咁，全世界都知」，「全線滅聲結果係咩？造市囉。你唔畀人講嘅目的係咩？政府想操控市場，我唯一諗到呢樣嘢」。

新加坡在獨裁統治下，同時做到國際金融中心。對此，羅稱要視乎政府與被管治人民的態度，「佢肯畀你統治，又統治得好，咪一個願打、一個願捱」。他認為內地有意將新加坡模式搬來香港，「覺得可以經濟放、政治唔放」，但直斥這是東施效顰，「你睇如今結局係根本收唔到科」，「權力使人腐敗，點解我哋相信市場好過獨裁？市場係眾人智慧，用眾人智慧，唔易出大錯」。

AppleDaily

不會重返「廚房」工作

相比環球經濟衰退，羅更憂慮政治對銀行體系可能帶來的影響，「成個制度畀外面感覺你係咪一個自由市場？」雖然香港是國際金融中心，但級數上仍落後紐約及倫敦，「如果想升級，唔應該做如今做緊嘅嘢，因為係倒行逆施……你要夠自由，錢可以隨意進出，人可以有自由經濟行為、資訊要流通，但現在蠶食緊」。他指歐美雖然都可能會控制市場，但有程度及觀感上的分別，「寧畀人知，莫畀人見」，資金安全十分重要，「你話你好穩陣，人哋信唔信就另一回事，金融中心係講信譽」。

早於2012年，羅家聰在一篇專欄寫道「香港前途命運的變質，不能不察」。如今本港正陷驚濤駭浪，他不諱言此事的發展方向不難推測，若經濟問題未有妥善處理，自然變成社會問題，再沒止血就惡化成政治問題，「已經係冇眼睇，再加把嘴講都不必」。

問到會否考慮重返政府工作，他搖頭，「有時撞到喺政府做嘢嘅舊同事，我第一句就話，你個廚房爆炸呀」。可能就是這一種敢言，讓羅家聰不得不走，比起處處退縮，他更加不願改變性格。